منتديات قلوب الحب

عزيزي الزائر / عزيزتي الزائرة يرجي التكرم بتسجبل الدخول اذا كنت عضو معنا
او التسجيل ان لم تكن عضو وترغب في الانضمام الي اسرة منتدي قلوب الحب
سنتشرف بتسجيلك
شكرا
ادارة المنتدي
منتديات قلوب الحب

منتديات قلوب الحب


    لهذه الاسباب أحب فيلم " THe Godfather "

    شاطر
    avatar
    اميرالقلوب
    عضو نشيط
    عضو نشيط

    أعلام الدول : Egypt
    عدد المساهمات : 79
    نقاط : 138
    السمعة : 0
    تاريخ التسجيل : 23/07/2009

    لهذه الاسباب أحب فيلم " THe Godfather "

    مُساهمة من طرف اميرالقلوب في الأحد أغسطس 02, 2009 1:28 am

    بسم الله الرحمن الرحيم






    الأب الروحى هو فيلمى المفضل .. وأرى أنه أفضل فيلم فى تاريخ الصناعة
    بأكملها .. وبما أن له فى قلبى مكانة خاصة جداً .. أهاب دائماً ان أنقده
    .. أشعر أنه فوق مستوى النقد (إذا جاز تعبيرُ كهذا) .. لذا حين وددت ان
    اكتب عنه قبل ذلك كتبت بعضُ من إنطباعاتى الشخصية بطريقة جدية تماماً ..
    فقط إنطباعات لا أكثر وليس نقد .. هذه المرة أحاول أن أقول رأيى فيه
    بأسلوب أخر !! ..















    لهذه الأسباب أحب فيلم "The Godfather" :









    1- عشان بحة صوت مارلون براندو العبقرية .. (تحس إنه شارب منقوع براطيش)




    2- عشان حركة إيد "براندو" ف أول مشهد فى الفيلم (لما بيحك خده بإصبعه
    الوسطى) .. عمرك شفت حركة بسيطة قد دى تتحول لواحده من أشهر اللزمات فى
    التاريخ !! ..










    3- عشان قعدة أل باتشينو لما جه يخطط لقتل "تاتاليا"
    (أحسن حطة رجل على رجل شفتها ف حياتى) .. وعشان برضه تعتبر أحسن لحظة تحول
    من خير لشر فى التاريخ من وجهة نظرى .. دى يمكن أحسن من تحول The Hulk بجلالة قدره !!





    4- عشان زوجة أل باتشينو الصقلية قمورة قوى (مُزه بصحيح) ..










    5- عشان أداء "جيمس كان" العصبى على طول (هو مال خلقه كان ديق كده ليه .. الظاهر "كوبولا" كان بيطرقعله وللا أيه !!)




    6- شفت لما أل باتشينو قال للمساعد إللى معاه "إرفع ياقة معطفك وحط إيديك
    فى جيوبك كأنك راجل خطر وشايل مسدس" .. وهو مكنش معاه نبلة حتى (صايع صايع
    يعنى).




    7- عشان "طبخة" كلمينزا - مساعد العيلة التخين -
    اللذيذة .. لما كان بيطبخ وبيحط نبيت على الأكل إللى بيشويه .. فاكرين ..
    (إبن اللذين بيجرى ريقى كل مره أشوف فيها الفيلم)











    8- عشان مشهد الغدر بجوز أخت "أل باتشينو" فى العربية .. لما خنقوه بعد
    أما دحلبوه فى الكلام و إدوله الأمان (نداله نداله يعنى) .. ده غير إن
    تصوير المشهد نفسه كان تحفه وعالى التكنيك جداً .. ويحسسك إنك معاهم فى
    موقع التصوير .. والسر ف كده طبعاً عشان جزمة الراجل كسرت قزاز العربية
    وخبطت الكاميرا خبطه بسيطه خالص وكانت مقصوده .. هى دى إللى تحسسك إنك
    قريب قوى من المشهد وكأنك واقف قدام العربية (أرشحه عشان يكون أحسن واحد
    إتخنق على الشاشة بطبيعية).




    9- عشان المونتاج المتوازى إللى فى نهاية الفيلم ..
    لما كان أل باتشينو قدام كبير القساوسة بيقول إنه بيطيع الله وبينكر
    الشيطان وكل أفعاله .. وبره كانت رجالته طايحه فى الخلق يمين وشمال !!
    (أما راجل قادر وميخفش ربنا صحيح ..).











    10- عشان مشهد "سونى" - إللى هوه جيمس كان - لما كان بيضرب جوز أخته فى
    الشارع و عجنه عجن (مفترى أه بس واد راجل ميطقش الهوا على أخته ..) ..
    وجوزها ده ياعينى إتبهدل مع العيلة دى قوى.




    11- عشان اللقطة العبقرية للحانوتى فى أول الفيلم
    خالص لما كان بيحكى للأب الروحى عن التحرش ببنته والكاميرا بتبعد عنه
    (شاريوه أو زووم أوت مش متأكد) لغاية ما بيخلص كلامه (الظاهر المصور كان
    مقلق منه وللا أيه ..).











    12- عشان مشهد "مارلون براندو" وهو بيتلقى خبر موت أبنه الكبير "سونى" ..
    الراجل حرك عضله واحده ف وشه وأثرت فيا أكتر من أى ممثلة من بتوع اليومين
    دول إللى تقعد تعيط وتلطم ساعتين قدام الشاشة .. (هى دى الكاريزما وللا
    بلاش يا جدعان ..)




    13- عشان الرصاصة إللى ضربها "أل باتشينو" ورشقت فى
    زور الشرطى الفاسد وهو بياكل فى المطعم (أه يا زورى..) بصراحة ريقى بيتحشر
    كل أما أشوفها .. كمان تعبير وش الراجل كان خرافى وكأنه بيقوله (بقى كل ده
    يطلع منك أنت يا عيل .. ده انا مفتشك بإيدى ومكنش معاك مسدس.. جبته منين
    يا لئيم) .. راجل غشيم ملوش ف شغل العصابات .. م "السيفون" يا مغفل !.











    14- لما مارلون براندو كان مجتمع بـ"تاتاليا" و "سونى" قاطعه فى الكلام ..
    راح قاله "شفت أنا مدلع عيالى إزاى .. مربتهومش كويس .. بيقاطعونى فى
    الكلام" .. والله زعيم مافيا قلبه طيب وعياله راكبين ومدلدلين.




    15 – عشان زعيم مافيا وقاعد بيلعب مع حفيده فى الجنينة (موراهوش حد يقتله الراجل ده وللا أيه ..).










    16- عشان الموسيقى جامده طحن فحت وردم .. وبصراحة كده عجبتنى أكتر من
    أغنية "العنب .. العنب" الأسطورية .. لا والله "نينو روتا" تفوق على سعد
    الصغير وبعرور بصحيح .. راجل مزجانجى مش أى كلام .. وعرف يجيب اللحن م الشمخ الجوانى.




    17- عشان مشهد "أل باتشينو" وهو رايح يخطب أيد البت
    الصقلية (شفتش عمرك عريس حاطت رجل على رجل قدام حماه المستقبلى وبيتأمر
    عليه .. واد واثق من نفسه .. مايكل كورليونى بقى إبن الحاج كورليونى
    الكبير الله يرحمه .. مين قده) .. والله كويس إن الراجل لم نفسه ومضربوش
    بالجزمة.











    18- عشان العبقرى "كوبولا" غلف الفيلم كله بإضاءة واحده تقريباً محكمة للغاية .. (هوه مكنش عنده غير كشاف نور لون واحد وللا أيه ؟؟)




    19- عشان القلم إللى خده "أل باتشينو" و كسرله فكه
    .. متهيألى من ساعتها وهو بيشرط على المخرجين إنه ميضربش ف أفلامه تانى
    أبداً .. يضرب بس (أمال .. حقه) .. وعشان كده لزق "ديان كيتون" - مراته -
    حتة قلم فى الجزء التانى طوحها بيه على الكنبة (خلص تارك .. طفى نارك) ..
    بقى كده تطلع غلك فى حرمه يا "أل" ..











    20- عشان كان نفسى يبقى ليا عيله زى دى (مقصدش لامؤاخذة مجرمين) إنما عيله
    مترابطه قوية كلهم بيقووا بعض و بيخافوا على بعض (شفتش عمرك واحده أخوها
    قتل جوزها وأخوها التانى .. راحت معيطلها شوية على ده وشوية على ده وبرضة
    فضلت تحبه وتحتويه !!).




    21- عشان الفيلم ده قدم لى "عرض لن أستطيع رفضه" .. يا إمأ أعتبره أحسن فيلم شفته ف حياتى


    _________________







      الوقت/التاريخ الآن هو الإثنين أغسطس 21, 2017 6:03 pm